පැතලි පියයුරු තිබ්බොත් මව්කිරි දෙන්න බැරි ද?
මේ ප්‍රශ්නයට නිවැරදි සහ එකම පිළිතුර “නැහැ, පුළුවන්” කියන එක.
සිරුර තුළ මව්කිරි නිපදවෙන ආකාරය සහ දරුවා මව්කිරි උරා බොන ආකාරය ගැන නිසි අවබෝධයක් ඔබට තිබෙනවා නම් මව්කිරි නිෂ්පාදනය ට හෝ මව්කිරි දීමට පියයුරෙහි හැඩය කිසිසේත් බලනොපාන බව ඔබට වැටහේවි.
මව්කිරි නිපදවෙන්නේ පියයුරු තුළ ඇති ක්ෂීර ග්‍රන්ථි (mammary glands)තුළ.
මෙම ක්ෂීර ග්‍රන්ථි අනු ග්‍රන්ථි රාශියකට බෙදී (මිදි පොකුරක් ආකාරයෙන්) මව්කිරි නිෂ්පාදන ක්‍රියාවලිය කාර්‍යක්ෂම ව සිදු කරනවා. වැඩුනු කාන්තාවකගේ එක් පියයුරක් තුළ මෙවැනි අනු ග්‍රන්ථි (lobules) 300 – 800 ක් අතර ප්‍රමාණයක් පවතිනවා.
කිරි නිපදවෙන්නේ කොහොමද?
කිරි නිපදවීම ට සංඥා සැපයෙන්නේ මොළයෙන් නිකුත් කරන ප්‍රොලැක්ටින් නම් හෝමෝනය මගින්. මෙලෙස නිපදවෙන මව්කිරි එම ග්‍රන්ථි තුළ ම ගබඩා වී තිබෙනවා. ඒ, මව්කිරි ස්‍රාවය සඳහා සංඥාව ලැබෙන තුරු. මේ සංඥාවේ ආරම්භකයා වන්නේ ඔබෙන් කිරි උරා බොන කුඩා දරුවා. ඔහු හෝ ඇයගේ කිරි ඉරීමට ප්‍රතිචාරයක් වශයෙන් මොළයෙන් ඔක්සිටොසින් නම් හෝමෝනය නිකුත් කරනවා. මෙම ඔක්සිටොසින් නිසා මව්කිරි, ග්‍රන්ථි තුළින් නිකුත් වී ක්ෂීර නාළිකා හරහා තන පුඩුව ට පැමිණෙනවා.
එසේනම් මව්කිරි නිෂ්පාදනය ට හෝ මව්කිරි දීමට ඍජුවම බලපාන්නේ මොළයේ හෝමෝන ක්‍රියාවලිය,පියයුරුවල ක්ෂීර ග්‍රන්ථි, දරුවාට මව්කිරි දෙන වාර ගණන සහ දරුවා උරා බොන කිරි ප්‍රමාණය බව පැහැදිලියි.
පියයුරෙහි හැඩය හෝ ප්‍රමාණය ක්ෂීර ග්‍රන්ථි ගණනට හෝ ඒවායේ ගුණාත්මක බවට කිසිදු බලපෑමක් නොකරන නිසා පැතලි පියයුරු තිබීමෙන් මව්කිරි දිය නොහැකි වේ යැයි අනියත බියක් ඇති කරගත යුතු නැහැ.
පියයුරෙහි හැඩය පමණක් නොවෙයි තනපුඩුවෙහි හැඩයත් මව්කිරි නිෂ්පාදනය ට හෝ මව්කිරි දීමට බලපෑමක් ඇති නොකරන නමුත් තන පුඩුව පිහිටන සමහර ආකාර නිසා දරුවාට පියයුර අල්වා ගැනීමට (latch) යම් අපහසුතා ඇතිවිය හැකියි.
පැතලි තනපුඩු ඇතිවිට කිරි දෙන්නේ කොහොමද
පැතලි තනපුඩු (flat nipples) හෝ ඇතුළට නෙරුන තනපුඩු (inverted nipples) තිබේ නම් අනිවාර්යයෙන් වෛද්‍ය උපදෙස් ලබාගත යුතුයි. එහිදී උපදෙස් ලැබෙන අන්දමට ඉවසිල්ලෙන් පුහුණු වීම සහ මව්කිරි දීමේ විවිධ ඉරියව් භාවිතා කිරීම තුළින් එම ගැටළුව විසඳා ගත හැකියි.
වෛද්‍ය තත්සරණී විජයරත්න
කථිකාචාර්ය – කැලණිය විශ්වවිද්‍යාලය
