මේ වන විට දියවැඩියාව වැනි බෝ නොවෙන රෝග දරුවන් අතරත් ව්‍යාප්ත වෙමින් පවතිනවා. අපේ ආහාර පුරුදුවලින් මෙවැනි බෝ නොවෙන රෝග වළක්වන්නට දෙමව්පියන් විදිහට ඔබට හැකියාව තියෙනවා. පොඩි පොඩි බඩගිනිවලට බිස්කට්, බනිස් වර්ග වෙනුවට ධාන්‍ය සහ වියළි පලතුරු එක්ක ගෙදර ම හදන සීරියල් බාර් එකක් දරුවට දෙන්න පුලුවන් නම් කොච්චර වටිනවද? ඉතින් අද මේ ලිපියෙන් කතා කරන්නේ ලංකාවෙ රසට ගෙදරදිම පෝෂණීය සීරියල් බාර් එකක් හදාගන්න විදිහ ගැනයි.
අවශ්‍ය ද්‍රව්‍ය
පාන්පිටි ග්‍රෑම් 100ක්
මුං ඇට පිටි ග්‍රෑම් 50ක්
කඩල පිටි ග්‍රෑම් 50ක්
රතුහාල් පිටි ග්‍රෑම් 50ක්
ඕට්ස් ග්‍රෑම් 50ක්
සීනි ග්‍රෑම් 100ක්
රටඉඳි ග්‍රෑම් 50ක්
රටකජු ග්‍රෑම් 50ක්
වියළි මිදි ග්‍රෑම් 50ක්
තල ඇට ග්‍රෑම් 50ක්
වියළි පොල් ග්‍රෑම් 50ක්
රුලං ග්‍රෑම් 50ක්
බටර් ග්‍රෑම් 100ක්
බිත්තර දෙකක්
වැනිලා තේ හැන්දක්
බේකින් පවුඩර් තේ හැන්දක්
ලුණු පිංචක්
හදන්නේ මෙහෙමයි
බිත්තර දෙක හොඳින් ගසා ගන්න.එයට බටර් දියකර එකතු කරන්න. එයට ම සීනි එක්කර දියවෙන තුරු මිශ්‍ර කරගන්න. දැන් පාන්පිටි, මුං ඇට පිටි සහ කඩල පිටි ටික එක් කර හොඳින් මිශ්‍ර කරන්න. ඉන්පසු ඉතිරි සියලු ද්‍රව්‍ය එක් කර හොඳින් මිශ්‍ර කරගන්න.දැන් 20cmx30cm තැටියකට බටර් ටිකක් තවරා මිශ්‍රණය දමා තුනී කරගන්න. 180C’උෂ්ණත්වයේ විනාඩි විස්සක් බේක් කරගන්න. නිවුණු පසු කෑලි කපා ගන්න. කෑලි 18ක් පමණ කපා ගත හැකියි. සුළං නොවදින සේ ඇසිරීමෙන් සති දෙකක් පමණ කල් තියා ගන්නට හැකියාව තිබෙනවා.
සටහන –
දිනිති චතුභාශිනි
