බබා හම්බුනාට පස්සෙ එහෙමත් නැත්නම් කිරි දෙනකොට කොණ්ඩෙ යනඑක ඉතාම සුලබයි. මේකට හේතුවෙන්නෙ රුධිරයේ තියෙන ඊස්ට්‍රජන් මට්ටම අඩුවෙන එක. අද අපි මේ ලිපියෙන් කතා කරන්නෙ දරු ප්‍රසූතියෙන් පස්සෙ හෝමෝන වෙනස්වීම් නිසා කොණ්ඩෙ යන එක සහ ඒ වෙනුවෙන් ඔබට කරන්න පුලුවන් දේවල් කිහිපයක් ගැන.
මුලින්ම කියන්න ඕනෙ කාරණය තමයි බබා ලැබුනට පස්සෙ කොණ්ඩෙ යන්නෙ බබාට කිරිදෙන නිසා නෙමෙයි. ඒ දෙක අතර කිසිම සම්බන්ධයක් නැහැ.
ගර්භණී කාලයේ සිදුවන හෝමෝන වෙනස්කම් නිසා කොණ්ඩෙ යනඑක වෙනදට වඩා අඩුයි. නමුත් දරු ප්‍රසූතියෙන් පස්සෙ හෝමෝන මට්ටම නැවතත් සාමාන්‍ය තත්වයට එනවා. එතකොට වෙනදා වගේම කොණ්ඩෙ යන්න ගන්නවා. එතකොට කොණ්ඩෙ යනඑක වැඩියි කියලා අපිට තේරෙනවා.
සාමාන්‍යයෙන් දවසකට කෙස්ගස් 50-100 අතර ප්‍රමාණයක් වැටෙනවා. දරු ප්‍රසූතියෙන් පස්සෙ එක පාරට හෝමෝන මට්ටම වෙනස්වෙන නිසා 70% පමණ කොණ්ඩෙ අඩුවීමක් වෙන්න පුලුවන්.
දරු ප්‍රසූතියෙන් පස්සෙ කොණ්ඩෙ යන එකට ප්‍රතිකාර තියෙනවද?
මේ කාලෙ කොණ්ඩෙ යන එක සාමාන්‍ය දෙයක් කියල ඔබ දැන් දන්නවනෙ. ඊලග වැදගත්ම කාරණය තමයි මේ තත්වය තියෙන්නෙ අවුරුද්දක් වගේ කාලයක් විතරයි. ඒ නිසා බහුතරයක් දෙනාට ප්‍රතිකාර අවශ්‍ය වෙන්නෙ නැහැ.
නමුත් බරපතල විදියට කොණ්ඩෙ යනවනම් වෛද්‍යවරයෙක් හමුවෙන එක හොඳයි. මොකද තයිරොක්සින් ඌණතා වගේ තත්ව වලදිත් කොණ්ඩෙ යන්න පුලුවන්.
කොණ්ඩෙ යනඑක අඩුකරගන්න ඔබට කරන්න පුලුවන් දේවල් මොනවාද?
පුලුවන් තරම් ස්වභාවික ශාකසාර අඩංගු මෘදු ෂැම්පු සහ කන්ඩිෂනර් පාවිච්චි කරන්න. කන්ඩිෂනර් පාවිච්චි කරනකොට කෙස්ගස් වල අග කොටසට විතරක් පාවිච්චි කරන්න. හිස්කබලේ කන්ඩිෂනර් ගෑවුනොත් කොණ්ඩෙ යන ප්‍රමාණය වැඩිවෙනවා. කොණ්ඩෙ තදින් පීරන්න එපා. ඒ වගේම කොණ්ඩ මෝස්තර දානකොටත් කොණ්ඩෙ ඇදෙන විදියෙ මෝස්තර දාන එක පුලුවන් තරම් අඩුකරන්න.
කොණ්ඩෙ අයන් කරන එක පුලුවන් නම් නවත්වන්න. අධික රස්නෙන් කොණ්ඩයට හානිවෙනවා. ඒ වගේම හෙයා ඩ්‍රයර් එකෙන් කොණ්ඩෙ වේලනවානම් රස්නෙ අඩුවෙන්ම දාලා වේලගන්න.
අනිත් වැදගත්ම කාරණය තමයි පෝෂ්‍යදායි සමබල ආහාර වේලක් ගන්න එක.
