බබාලගෙ බර වැඩි කරගන්න අම්මලා නොකරන දෙයක් නෑ. කෑම කවන එක යුද්ධයක් බවට පත් වෙන්නේ පවා ඒකයි. නියමිත ක්‍රියාකාරකම් කරනවා නම් බරෙහි කුඩා වෙනස්කම් නොසැලකිය හැකි බවයි වෛද්‍ය මතය. ගොඩාක් බර අඩු නම්, තව ටිකක් නර තිබුණොත් හොඳයි කියලා හිතන අම්මලට අද අපි ගෙනවා පෝෂණීය බර වැඩි කරන සීරියල් එකක්. මේක ගෙදරදීම පහසුවෙන් පිරිසුදුව හදාගන්න පුලුවන්.
සැලකිලිමත් විය යුතු දේ
අවුරුද්දට වැඩි දරුවන් සඳහා පමණක් භාවිතා කරන්න.
සෑම ද්‍රව්‍යයක්ම දරුවාට පෙරදී ලබා දී අසාත්මික නොවුණ දෙයක් බවට තහවුරු කරගන්න.
අවශ්‍ය ද්‍රව්‍ය
රතු කැකුළු සහල් 100g
සුවඳැල් 50g
කුරක්කන් 50g
මුං ඇට 100g
බඩ ඉරිඟු 50g
තල ඇට 50g
කව්පි 50g
කජු 50g
ආමන්ඩ් 50g
කහ පරිප්පු 50g
හදන්නේ මෙහෙමයි
මේවා හොඳින් සෝදා වියළා ගන්න.
දැන් වෙන වෙනම කබලක දාගෙන බැදගන්න.
ඉන්පසු බ්ලෙන්ඩර් එකක දමා කොටාගන්න.
කුඩා පෙනේරයකින් හලා ගන්න.
ඉතිරි කොටස් නැවත කොටාගන්න.
ඉන්පසු හොඳින් පියන වැසිය හැකි පිරිසිදු වියළි බෝතලයක දමා ගන්න.
භාවිතා කරන විට වියළි හැන්දක් පමණක් භාවිතා කරන්න.
කෑමට සකසා ගන්නා ආකාරය
කිරි කෝප්පයකට සීරියල් මේස හැඳි දෙකක් දමා පානයක් ලෙස ගත හැකිය.
කිරි කෝප්ප කාලකට මේස හැඳි තුනක් දමා සීනි සහ ලුණු එක් කර තලපයක් ලෙස ගත හැකිය.
සීරියල් කෝප්ප බාගයක්,පොල් කෝප්ප බාගයක් සහ සීනි සහ ලුණු එක්කර අග්ගලා සැකසිය හැකිය.
ටෝස්ටර් කේක් ලෙස පාන්පිටි වෙනුවට ආදේශකයක් ලෙස භාවිතා කළ හැකිය.
බිත්තරයක්, එළවලු සහ සීරියල් හැඳි දෙකක් දමා ඔම්ලට් එකක් සේ භාවිතා කළ හැකිය.
