සාම්ප්‍රදායික rainbow sandwiches හදන්න ඇත්තට ම මේ දවස්වල ආර්ථිකව අපහසුයි. ඒත් දරුවන්ගේ කටයුතුවලදී අපිට එහෙම කියලා හිත හදාගන්න බෑ. ඒ නිසයි අපි ඔබට ඉතා ම ලාබදායක විදියට නමුත් පෝෂණීය ව මේ rainbow sandwiches හදන්න කියා දෙන්නේ. මේ sandwiches කෙටි වේලකට වගේ ම lunch box එකටත් යොදාගන්න පුලුවන්.
අවශ්‍ය ද්‍රව්‍ය
වාටි කැපූ පාන්පෙති හතරක්
ස්ටීම් කර පොඩි කරන ලද නිවිති කොළ පහක්
ස්ටීම් කර පොඩි කරන ලද වට්ටක්කා ටිකක්
තම්බා පොඩි කරන ලද පරිප්පු ටිකක්
බිත්තර කහ මදයක්
බටර් තේ හැඳි තුනක්
හදන්නේ මෙහෙමයි
නිවිතිවලට බටර් ටිකක් දමා මිශ්‍ර කරගන්න. වෙනම බඳුනක වට්ටක්කා සමග බටර් ටිකක් දමා මිශ්‍ර කරගන්න.
බිත්තර කහ මදය, පරිප්පු සහ බටර් වෙනම මිශ්‍ර කරගන්න.
සියල්ලට රස අනුව ලුණු එක් කරගන්න.
දැන් එක් පාන් පෙත්තක් ගෙන එහි නිවිති මිශ්‍රණය තවරා ගන්න.
එය තව පාන් පෙත්තකින් වසා ගන්න. දැන් ඒ මත වට්ටක්කා මිශ්‍රණය තවර ගන්න. එයමත තවත් පාන් පෙත්තක් තබා ඒ මත බිත්තර මිශ්‍රණය තවර ගන්න. දැන් ඉතිරි පාන් පෙත්තෙන් වසා ගන්න.
ප්‍රවේශමෙන් ත්‍රිකෝණාකාර ව කපා ගන්න.
