ලහිරු වයස අවුරුදු අටක පොඩි පිරිමි ළමයෙක්.එයා හරිම ආසයි සරුංගල් යවන්න.ඒ විතරක් නෙවෙයි සරුංගල් හදන්නත් ලහිරු හරිම දක්ෂයි.ලහිරුට හරිම ලස්සන සරුංගලයක් තිබුණා.දිග වරලක්,ලස්සන පාට පාට ඇඟක් තිබුණ මේ සරුංගලය තරම් ලස්සන එකක් මීට කලින් කිසිම කෙනෙක් දැකලා නම් නැහැ.ලහිරු සරුංගලය එයාගෙ හොඳම යාළුවා කියලා තමයි හිතුවේ.ඒ නිසා එයා සරුංගලයට නමකුත් දැම්මා. “හරිම ලස්සන යාළුවා”ඒ තමයි එයාගෙ නම.
ඔන්න දවසක් ලහිරු එයාගෙ හරිම ලස්සන යාළුවා එක්ක පිට්ටනියට යනවා.තවත් ළමයි බොහොමයක් සරුංගල් යවන්න ඇවිත්.වෙනදට වඩා පිට්ටනියේ සෙනග.
“අද මෙතන සරුංගල් තරඟයක් තියෙනවලු පුතේ.”
ලහිරුගෙ තාත්තා ලහිරුට කිව්වා.ලහිරුටත් ආසා හිතුණා තරඟ කරන්න.එයාගෙ හරිම ලස්සන යාළුවා අහසේ ඈතට ඈතට යන්නත් හරිම සූරයා.ඒ නිසා තාත්තාට ඇවිටිලි කරලා ලහිරුත් කොහොමහරි තරඟයට ඉදිරිපත් වුණා.
ඔන්න හැමෝම සරුංගල් යවන්න පටන් ගත්තා.කවුරු කවුරුත් තමන්ගෙ සරුංගලය පුලුවන් තරම් උඩට ගන්න තමා බලන්නෙ.ලස්සනම සරුංගලය වගේම වැඩියෙන්ම උඩ ගියපු සරුංගලයටත් තෑගි ලැබෙනව.
ලහිරුගෙ සරුංගලය ලස්සනම ලස්සන නැටුමක් නටලා හෙමින් හෙමින් උඩ ට ගියා.එයා කොච්චර ලස්සන ද කියනවා නම් එයාගෙ ලස්සන බලන්න ගිහින් අනික් අයගෙ සරුංගල් වල නූල් එකිනෙකට පැටලුණා.සරුංගල් පොකුරක් හැදුණා.ඒ සරුංගල් පොකුර හැමෝගෙම අත් වල තිබුණ නූල් කඩාගෙන ඉහල අහසට ඉගිලුණා.හරිම වැඩේ.ලහිරුගේ හරිම ලස්සන යාළුවා විතරක් අහසේ ඉතිරිවුණා.
සරුංගල් අයිති ළමයි හයියෙන් අඬන්න පටන් ගත්තා.එයාලට සරුංගල් ඕන කියලා මහා හයියෙන් ඇඬුවා.ලහිරුට හරිම දුකයි.සරුංගලේටත් හරිම දුකයි.
ජයග්‍රාහකයා ලහිරු බව තරඟ සංවිධායකවරු නිවේදනය කළා.විශාල මුදලක් ලහිරුට තෑගි විදියට ලැබුණා.ලහිරු ඒවත් අරන් ගෙදර ගියේ නැහැ.එයා සරුංගල් නැතිවෙලා අඬන හැම ළමයෙක් ලඟටම ගියා.එයාගෙ ලස්සන සරුංගලය වගේම එකක් හදලා දෙන්න පොරොන්දු වුණා.හැමෝම ඒ වෙලාවෙම වැඩ පටන් ගත්තා.ලහිරුගෙ තාත්තා වගේම අනෙක් වැඩිහිටියන් ඉක්මනින්ම අවශ්‍ය දේවල් අරගෙන ආවා.
දැන් පිට්ටනිය පුරාම ළමයි සරුංගල් හදනවා.ලහිරු එයාලට කියා දෙනවා.පැය කිහිපයකින් සරුංගල් දහස් ගණනාවක් හදලා ඉවරයි.මොකද්ද දන්නවද ඒවගෙ වෙනස්.ඒ ඔක්කොම ලහිරුගේ සරුංගලය වගේමයි.ඉතින් හැමෝටම හරිම සතුටුයි.කාටවත් ලහිරුගෙ සරුංගලේ ලස්සන ගැන හිත හිතා අනේ මටත් එහෙම එකක් තිබුණා නම් කියලා දුක් වෙන්න දෙයක් නැහැ.හැමෝටම දැන් “හරිම ලස්සන යාළුවෙක්”ඉන්නවා.
තරඟ සංවිධායකවරු අලුත්ම තරඟයක් සංවිධානය කළා.හැමෝම තමන්ගෙ සරුංගල් සතුටින් අහසට යැව්වා.මේ සැරේ නම් කිසිම කලබලයක් වුණේ නැහැ.සරුංගල් ඔක්කොම අහසේ ලස්සනට පාවෙමින් හිනාවුණා.එච්චර ලස්සන සරුංගල් තරඟයක් කවදාවත් කිසිම කෙනෙක් දැකලා තිබුණේ නැහැ.ආව හැමෝටම තෑගි දෙන්න තරඟ සංවිධායකවුරුන්ට සිදුවුණා.
කතාව චම්මි ඉරේෂා කරපුටුගල නැන්දාගෙන්
