ගර්භණී කාලයේ මවකට ලැබෙන පෝෂණය අනුව තමයි දරුවාගේ වර්ධනය තීරණය වෙන්නෙ. නීරෝගී දරුවෙක් පතන ඔබ අනිවාර්යයෙන්ම ඔබේ පෝෂණය ගැන සැලකිලිමත් වෙන්නම ඕනෙ. ගර්භණී සමයේ එක එක කාලවල ඔබට අවශ්‍ය වෙන පෝෂ්‍ය කොටස් ප්‍රමාණ එකිනෙකට වෙනස්. අපි අද කතා කරන්න යන්නෙ සති 12ක් එහෙමත් නැත්නම් මාස 3ක් සපිරුනු මවකට අවශ්‍ය පෝෂ්‍ය කොටස් ගැනයි. සති 12 ඉඳන් දරුවා ලැබිලා මාස 6ක් යනතුරු ඔබ මේ විටමින් වර්ග ටික අනිවාර්යයෙන්ම ගන්න ඕනෙ.
1. යකඩ
ගර්භණී හෝ කිරිදෙන මවකට දවසකට යකඩ මිලි ග්‍රෑම් 60ක් අවශ්‍ය වෙනවා. රක්තහීනතාවයෙන් පෙලෙන මවකගේ යකඩ අවශ්‍යතාවය මේ වගේ දෙගුණයක් වෙනවා. ඒ නිසා සති 12න් පස්සෙ ඔබ දිනකට යකඩ පෙති එකක් (200mg) අනිවාර්යයෙන්ම ගන්න ඕනෙ. රක්තහීනතාවයෙන පෙලෙන මවකට ඇයගේ රුධිරයේ හීමෝග්ලොබින් ප්‍රමාණය අනුව යකඩ පෙති එකක් හෝ දෙකක් නියම කරාවි.
2. ෆෝලික් අම්ලය
සති 12න් පස්සෙ ඔබේ ෆෝලික් අම්ල අවශ්‍යතාවය දිනකට මයික්‍රෝ ග්‍රෑම් 400ක්. ඒ කියන්නෙ ෆෝලික් අම්ල පෙති 1ක් ප්‍රමාණවත්.
3. විටමින් C
ඔබ ගන්න යකඩ ශරීරයට අවශෝෂණය කරගන්න විටමින් සී අත්‍යවශ්‍ය වෙනවා. ඒ නිසා යකඩ ගන්න හැම වෙලාවෙම ඒත් එක්ක විටමින් C පෙත්තක් (100 mg) ගන්න අමතක කරන්න එපා.
4. කැල්සියම්
ගර්භණී මවකගේ දිනක කැල්සියම් අවශ්‍යතාවය මිලි ග්‍රෑම් 1200ක්. ඒ නිසා ඔබ දිනකට එක කැල්සියම් පෙත්තක් බැගින් ලබාගන්න ඕනෙ. කැල්සියම් ගන්න වෙලාවට ඒත් එක්ක යකඩ පෙති ගන්න එපා. මොකද කැල්සියම් වලින් යකඩ අපේ ශරීරයට උරාගන්න එක අඩු කරනවා සහ යකඩ වලිනුත් කැල්සියම් අවශෝෂණය අඩු කරනවා. ඒ නිසා ඔබ කැල්සියම් පෙත්ත උදේට ගන්නවා නම්, යකඩ පෙත්ත, විටමින් C එක්ක රෑට ගන්න.
මේ සියලුම විටමින් වර්ග ඔබේ ප්‍රදේශයේ සෞඛ්‍ය නිලධාරී කාර්යාලවලින් සහ මාතෘ සායනවලින් ඔබට නොමිලයේම ලබාගන්න පුලුවන්. ඒ නිසා නියමිත විදියට සායනවලට යන්න අමතක කරන්න එපා.
සටහන –
වෛද්‍ය S. එදිරිසිංහ(MBBS (Rajarata)
(SLMC registration No:43303)
පේරාදෙණිය ශික්ෂණ රෝහල
